Shumë të rinj, veçanërisht të ardhurit nga rrethet, për të studiuar në Tiranë, iu duhet të punojnë, për të përballuar qiranë, shkollën, ushqimin dhe veshjet.
Por të ndodhur nën këtë trysni të përditshme, ata përpiqen të mbajnë lart përqendrimin në shkollë dhe punë.
Valentina Asabella, Mjeke Psikiatre thotë për TCH: “Në fakt vërej tek moshat mbi 18 vjeç, studentë, që tregojnë se për të përballuar edhe shkollën edhe punën, fillojnë të konsumojnë shumë kafe, shumë pije energjike, ka raste edhe 6 kanaçe ne ditë. Kur këto nuk ia japin më energjinë që u duhet, nisin konsumimin e hashashit, apo edhe drogave të tjera. Punojnë në restorante që mbyllen vonë, në call center-a, pube. Ka raste kur edhe bëjmë debat me ta, pasi kërkojnë të na bindin ne specialistëve, që drogat janë rezultative.
Këmbëngulin që edhe ne ta normalizojmë përdorimin e tyre. Dua të përqëndrohem për diplomën, apo për sezon provimesh, thonë. Lexojnë në internet për marijuanën për qëllime mjekësore, që në fakt nuk ka lidhje, me atë që shitet në mënyrë të jashtëligjshme. Ka që bëjnë edhe 48 orë pa gjumë, fillojnë të ndihen të këputur, të shpërqëndruar, kanë probleme me kujtesën, truri është i mbingarkuar dhe i pashlodhur. Çrregullimet e ankthit janë më e pakta. Ne iu themi që droga mund të japë rezultate fillimisht, por iu hap rrugën problemeve të shëndetit mendor deri tek psikozat.”
Ndryshimet fizike dhe psikologjike që shkaktojnë drogat?
Tek përdoruesit e kanabisit vihen re këto ndryshime, si: skuqje të syve, paranoja, humbje të oreksit, reagim të vonuar, vështirësi në përqendrim, kujtesë e dobët.
Tek përdoruesit e qetësuesve (valium, xanax, librium,etj) vihen re shenja të përgjumjes, vështirësi në të folur, konfuzion, depresion, probleme me kujtesën, marramendje, si dhe rrahje të ngadalta të zemrës.
Kokaina dhe stimulantë të tjerë (metamfetaminat) vihen re këto ndryshime: eufori, e folur e shpejtë, rrahje të shpeshta zemre, pagjumësi, humbje në peshë, paranojë, nervozizëm.
Haluçinogjenët (PCP, LSD) tek përdoruesit e këtyre drogave shihet: eufori, rrahje të shpejta të zemrës, perceptim i reduktuar i realitetit, iluzione, depresion, sjellje e dhunshme.
Opioidet (heroina, morfina, kodeina, metadoni) japin një ndjenjë qetësie, frymëmarrje të ngadalësuar, kapsllëk, depresion. Kur droga injektohet në vena, vihen re edhe shpimet e bëra.
