Kuvendi i Shqipërisë ka miratuar ligjin “Për parandalimin dhe mbrojtjen nga dhuna ndaj grave dhe dhuna në familje”, i cili synon parandalimin, eliminimin dhe mbrojtjen nga të gjitha format e dhunës ndaj grave dhe dhunës në familje, në veprimtarinë publike, private, përfshirë dhunën në mjedisin digjital.
Në nenin 17 të këtij ligji të miratuar me 85 vota pro, 1 abstenim dhe 0 kundër, parashikohet rehabilitimi i viktimave dhe të dhunuesve, nëpërmjet programeve që synojnë ndërhyrjet e hershme parandaluese në komunitet; mbështetjen psikosociale dhe rehabilitimin e viktimave; trajtim psikosocial/mjekësor për dhunuesit.
Trajtimi psikosocial dhe shëndetësor i personave dhunues me probleme të shëndetit mendor është thelbësor, jo vetëm për rehabilitimin e tyre, por edhe për parandalimin e përsëritjes së dhunës. Qasja terapeutike dhe mbështetja e specializuar ndihmojnë në adresimin e shkaqeve të sjelljes së dhunshme, rritjen e kontrollit emocional dhe mbrojtjen e sigurisë së viktimave dhe të komunitetit në tërësi.
Ligji i ri shfuqizon ligjin nr. 9669, datë 18.12.2006, i cili vendoste theksin kryesisht te “dhuna në familje”, që nuk ishte e mjaftueshme për mbrojtjen nga të gjitha format e dhunës ndaj grave. Forma të tjera të dhunës ndaj grave, ndonëse të parashikuara si vepra penale, nuk kanë marrë vëmendjen e duhur në lidhje me parandalimin dhe masat e mbrojtjes civile e administrative.
Të gjitha risitë e ligjit:
- Zgjerimi i objektit përtej mbrojtjes duke përfshirë parandalimin, mbështetjen, rehabilitimin e viktimave dhe trajtimin e dhunuesve
- Zgjerimi i formave të dhunës dhe njohja e dhunës digjitale
- Mbrojtje e personalizuar përmes vlerësimit individual të riskut
- Arkitekturë e re e urdhrave të mbrojtjes dhe rol i forcuar i Policisë
- Masa të forta për mjedisin digjital dhe përgjegjësi për platformat
- Ndalimi i ndërmjetësimit dhe forcimi i qasjes me në qendër viktimën
- Parandalimi, trajnimi dhe roli i aktorëve jo-publikë
- Koordinim institucional dhe sistem i konsoliduar të dhënash
- Zbatim i programuar dhe tranzicion i kontrolluar
Ky material është realizuar me mbështetjen financiare të Bashkimit Evropian në kuadër të projektit SMS Facility – Small Media Support in Western Balkans, i zbatuar nga SCiDEV. Përmbajtja është përgjegjësi e vetme e medias dhe autorit dhe nuk pasqyron domosdoshmërisht pikëpamjet, opinionet apo vlerat e Bashkimit Evropian, SCiDEV apo projektit SMS Facility. |
