Mjekja endokrinologe Tea Shehu, në kuadër të ciklit të podcasteve “Obeziteti, le të flasim për të”, ka shpjeguar pse shumë vajza dhe gra përjetojnë një rritje të oreksit në ditët para ciklit menstrual.
Sipas saj, kjo është një dukuri që lidhet me luhatjet hormonale gjatë ciklit menstrual, veçanërisht me fazën luteale.
“Mund të kemi dëgjuar shpesh vajzat që përpara se t’u vijë cikli kanë oreks të shtuar dhe kjo ka një shpjegim. Ka një shpjegim hormonal”, tha Shehu.
Ajo shpjegoi se në fazën luteale, e cila i paraprin menstruacioneve, mbizotëron hormoni progesteron, i cili mund të ndikojë në rritjen e oreksit.
“Në fazën luteale, që është faza përpara fillimit të ciklit menstrual, mbizotëron një hormon që është progesteroni dhe progesteroni është hormon oreksogjen. Le të themi se është një përshtatje e organizmit për të rritur marrjen e kalorive për të përballuar ato ditë që do të vijnë më pas”, u shpreh mjekja.
Sipas endokrinologes, ndryshimet hormonale gjatë ciklit mund të ndikojnë në sinjalet që kontrollojnë urinë dhe ngopjen, duke bërë që në fazën luteale të rritet ndjesia e urisë.
“Edhe luhatjet e vogla hormonale që ndodhin gjatë ciklit menstrual shoqërohen me ndryshime në sinjalet e oreksit dhe të urisë dhe, në rastin e fazës luteale, ato favorizojnë oreksin”, përfundoi Tea Shehu.
