Instituti i Shëndetit Publik bën të ditur se bazuar në të dhënat e mbledhura nga sistemi i referimit të rasteve me SRRA (Sindromë të Rëndë Respiratore Akute), deri më datë 3 mars 2014 kanë ndodhur 2 raste vdekjeje te konfirmuara nga laboratori virologjik të prekur me virusin pandemik A(H1):
-një paciente e moshës 30-vjeçare e shtruar në SU “Shefqet Ndroqi, e diagnostikuar me Insufiçencë Multiorganore, Anemi dhe Pneumoni Bilaterale. Ndërkohë, pacientja, e cila ishte shtatzanë 13–javëshe, ishte diabetike e tipit të I-rë Insulinovartëse dhe kishte edhe simptoma të Nefropatisë Diabetike dhe Kardiopatisë së Dilatuar. Në paraditen e datës 27/02/2014 pacientja ka ndërruar jetë, dhe në pasditen e datës 27/02/2014, nga përgjigjet rezulton se pacientja ka qenë pozitive me virusin A(H1)pdm09;
-një pacient i moshës 86 vjeç që rezultoi pozitiv me virusin A(H1) pdm09. Pacienti manifestoi insuficiencë kardio-cirkulatore dhe sindromë të rëndë respiratore dhe ndërroi jetë pak orë pas mbërritjes në QSUT.
Situata Epidemiologjike e Gripit në Shqipëri
Prej javës së 3-të të muajit tetor 2013 deri më datën 2 mars 2014 janë dërguar në ISHP 486 mostra nga persona të dyshuar për grip.
Gjithsej, 77 (16%) mostra kanë rezultuar pozitive me viruset e gripit. 36 (47%) prej mostrave pozitive kanë rezultuar me virusin A(H3) dhe 41 (53%) mostrave pozitive me virusin A(H1) pdm09.
