“Ne nuk kemi pasur gjak dhe jemi shtrirë e kemi dhënë vetë gjak për pacientët”. Kështu u shpreh Apostol Vaso, mjek në Spitalin e Traumës. I pyetur lidhur me mungesat e ilaçeve, ai tha se jo vetëm ilaçet, por edhe gjaku ka munguar në spitalin ku ai punon.
Ndërkohë, mjekja Anila Godo tha se edhe pse gjendja e furnizimit me ilaçe është përmirësuar, në fakt sërish ka mungesa. “Asnjëherë nuk i kemi të gjitha ilaçet. Ky është një problem i pazgjidhur. Problem tjetër janë ekzaminimet, të cilat nuk mund t’i bëjmë në spitalin shtetëror dhe i drejtojmë në privat. E them disa herë që biopsia për fëmijë nuk bëhet në shtet. Nuk dimë se si t’ia themi pacientit. Këtu lindin problemet për të cilat mund të akuzohemi. Nëse e dërgojmë pacientin të blejë ilaçet në farmaci, të ekzaminohet në privat, sigurisht që ai do të jetë i pakënaqur”, përmbylli Godo. Deklaratat u dhanë në emisionin e mbrëmshëm në “News24”.
