Myku (candida albicans) është një nga problemet më të përhapura gjinekologjike, të cilin e provojnë shumica e femrave të paktën një herë në jetë. Simptomat janë djegie, kruarje dhe dhimbje.
Sipas një studimi të kryer në Itali, 28% e adoleshenteve dhe 25% e nënave shtatzënë vuajnë nga 
myku. Në 83% të rasteve një problem i tillë cenon cilësinë e jetës dhe 8 nga 10 pacientë heqin dorë nga marrëdhëniet seksuale. “Myku është një problem shumë i bezdisshëm që rëndon si mbi femrat dhe mbi meshkujt, – thotë mjeku italian Paolo Scollo. – 76% e femrave italiane thonë se edhe partneri i tyre ka pasur probleme me infeksionet mykotike. Shqetësimi, nëse nuk kurohet, mund të transmetohet dhe krijon efektin ping-pong tek çifti”.
6 rregulla që duhen ndjekur.
Stresi, një dietë shumë e pasur me sheqer, veshje të ngushta dhe të brendshme jo të përshtatshme janë disa nga shkaqet kryesore të mykut vaginal.
Për ta parandaluar, mjekët rekomandojnë ndjekjen e 6 rregullave:
-Larja rregullisht e zonës intime me pastrues me pH fiziologjik (pH 4 ose 5), duke shmangur sapunët ose deodorantët intimë;
-Në zgjedhjen e të brendshmeve është mirë të evitohen fibrat sintetike apo artificiale;
-Ndiqni një dietë të ekuilibruar, të pasur me fruta e perime;
-Përdorni gjithnjë masa mbrojtëse gjatë marrëdhënieve seksuale;
-Konsultohuni me mjekun nëse shfaqen simptoma si: djegie, kruarje, shtim sekrecionesh, vështirësi në urinim ose dhimbje gjatë raportit seksual;
-Mos përdorni rroba të familjarëve tuaj./ Përgatiti: Arlinda Gjypi
