Merr fund kalvari i gjatë i ecejakeve për të marrë një shërbim tek mjeku specialist. Këtë të paktën na premton kreu i vendit, Edi Rama, me ndryshimin e procedurave për prenotimin e vizitave tek mjeku specialist.
Përmes një videoje të postuar mëngjesin e sotëm, Rama bën me dije se tashmë vizitat tek mjeku specialist do të bëhen pas një referimi online, duke marrë kështu fund, sipas Ramës, radhët e gjata dhe procedurat burokratike nga njëra zyrë në tjetrën.
Sipas dr. Bruna Shiroka, mjeke familje, sistemi i rekomandimit elektronik do të mundësojë shmangien e ecejakeve të shtuara të pacientëve nga sistemi parësor në sistemin sekondar. Duke u bazuar tek dosja elektronike e pacientëve, mjekët specialist gjithashtu do ta kenë më të lehtë të gjykojnë për gjendjen shëndetësore të tyre dhe të japin trajtimin e duhur.
Aktualisht sistemi elektronik funksionon vetëm në Tiranë dhe pritet që brenda vitit 2018 të përhapet në të gjithë Shqipërinë./ Shendeti.com.al
