Shtatzënia në adoleshencë prek miliona vajza çdo vit, kryesisht në vendet me të ardhura të ulëta dhe të mesme. Komplikacionet gjatë shtatzënisë përbëjnë shkakun kryesor të vdekjes në vajzat e moshës 15-19 vjeç në këto vende. Parandalimi i këtij fenomeni është esencial për shëndetin publik.
Në Shqipëri abortet midis adoleshenteve zënë rreth 5% të numrit total të aborteve. Përqindja e aborteve tek adoleshentet që banojnë në zonat urbane është shumë më e lartë se tek ato që banojnë në zonat rurale (përkatësisht 65.1% dhe 34.9% për vitin 2012). Abortet me kërkesë te femrat adoleshente kanë ardhur në ulje për periudhën 2009-2012 (përkatësisht 37.2% dhe 20.1%)
Përpjekje më serioze për parandalimin e shtatzënive tek adoleshentet, nëpërmjet informimit dhe edukimit në komunitet apo grupet në rrezik të lartë, promovimit të përdorimit të kontraceptivëve dhe shmangies së sjelljeve të rrezikshme kanë potencialin për të reduktuar shtatzënitë e padëshiruara tek adoleshentet në Shqipëri.
Në Shqipëri informacioni lidhur me abortet në adoleshencë është i paplotë. Gjatë periudhës 2009-2012 rreth një në 20 aborte në vendin tonë kryhen tek adoleshentet 15-19 vjeç, kurse për Tiranën përqindja e aborteve tek adoleshentet kundrejt numrit total të aborteve ishte 3.4%, 3.7%, 3.3% dhe 1.8%, përkatësisht për vitin 2009, 2010, 2011 dhe 2012. Midis vajzave adoleshente që kanë kryer abort, rreth 2/3 e tyre jetojnë në zonat urbane. Nevojiten fushata edukuese, informuese dhe ndërgjegjësuese në mënyrë që të ulet numri i shtatzënive të padëshiruara në adoleshencë, aborteve dhe komplikacioneve të tyre në vendin tonë./ISHP
