Sipas një studimi, një grusht arra në ditë ndihmon në ngadalësimin e rritjes së tumoreve të kancerit.
Acidet yndyrore Omega 3 dhe përbërësit e tjerë në arra mund të ulin inflamimin në qelizat e kancerit të zorrëve. Ato gjithashtu ulin furnizimin me gjak të tumorit, duke ngadalësuar rritjen e tij.
Kanceri i zorrëve, i quajtur edhe kanceri kolorektal, është lloji i tretë më i zakonshëm i kancerit në mbarë botën dhe është shkaku i dytë kryesor i vdekjes në vendet perëndimore, pas kancerit të mushkërive.
Hulumtimet kanë treguar që 30-50 % të kancerit të zorrëve tek meshkujt dhe 20 % tek gratë mund të parandalohen duke u ushqyer shëndetshëm dhe duke ndryshuar mënyrën e jetesës.
Studimi i drejtuar nga dr. Kristos Mantzoros, i Shkollës Mjekësore të Harvardit, është i pari i këtij lloji për të analizuar ndikimin e arrave në acidet mikro ribonukleike (miARN), të cilat kontrollojnë se si gjenet përshtaten me faktorët e mjedisit. Ai tha: “Hulumtimi ynë tregon se një dietë me arra shkakton ndryshime të rëndësishme në profilin e pasqyrimit të miARN-së në indet e kancerit kolorektal. Përbërësit në arra bëjnë që acidet yndyrore Omega 3 mbrojtëse, të mblidhen më shumë në qelizat e tumorit.”
Hulumtuesit ushqyen dy grupe minjsh në mënyrë të tillë që njëri grup do ushqehej me arra dhe tjetri me një dietë kontrolli. Pas 25 ditësh ata gjetën që tek minjtë e ushqyer me arra, miARN mund të ndikojnë inflamacionin e qelizave të kancerit, furnizimin me gjak dhe përhapjen e shpejtë.
Tumoret e minjve të ushqyer me dietën që përmban arra kishin 10 herë më shumë acide yndyrore Omega 3 krahasuar me minj të ushqyer me dietë kontrolli.
Kjo përfshin acid alfa linolenik me bazë bimore (ALA), një acid i njohur për aftësinë e tij për të ulur inflamacionin.
Studimi, i publikuar në Gazetën e Biokimisë Ushqyese, ka gjetur se sa më e madhe sasia e acideve Omega 3, aq më i vogël tumori, duke sugjeruar kështu se acidi ALA mund të ofrojë mbrojtje.
Norma e rritjes së tumorit ishte në mënyrë të konsiderueshme më e ngadalshme në grupin e parë të ushqyer me arrë krahasur me grupin e kontrollit, por shkencëtarët thonë se për shkak se studimi është kryer tek kafshët, rezultatet nuk janë domosdoshmërisht të njëjta dhe për njerëzit.
Arrat janë të vetmet nga grupi i tyre (bajamet, lajthitë, kikirikët etj) që përmbajnë një sasi të madhe të acidit ALA, si dhe një shumëllojshmëri të antioksidantëve, vitamina të shumta dhe minerale./ Përgatiti në shqip: Elsa Musaj
