Denisa Canameti, gazeta “Shëndet+”
Mungesa e kushteve për një shërbim optimal në QSUT nuk është më e panjohur. Sorollatjet për vula, për të kryer ekzaminimet përbëjnë makthin e përditshëm të pacientëve. E makth mbi makth është mungesa e aparaturave apo laboratorëve për të kryer ekzaminimet.
Pjesa më e madhe e pacientëve janë rrogëtarë që kanë një nivel jetese mesatar e shumë të tjerë që nuk kanë asnjë të ardhur. Pacientë të kalibrit Kryeministër apo ministër Shëndetësie kanë zgjedhur spitalet private, aty ku nuk kanë munguar as investimet e shumta.
Pacientja S.N., një e moshuar 60-vjeçare, e cila si të ardhur ka vetëm pensionin e shtetit, një shumë minimale është detyruar të paguajë 6800 lekë për të kryer 4 analiza në një nga spitalet private. Kjo sepse analiza të tilla, si: feçe gjak okult, ferritinë, vitaminë B12 dhe acid folik nuk kryhen në QSUT. E moshuara shprehet shumë e shqetësuar, pasi këto analiza, pa medikamentet, i kanë kushtuar asaj sa një pension.
Me situata përballen çdo ditë pacientët të cilët tregojnë për “Shëndet+” se sa e vështirë është që të mbyllësh çdo ekzaminim në shtet.
“Edhe kur punon aparatura, prapë mjekët nuk na japin siguri për rezultatet, kjo sepse patjetër ajo aparaturë e ka një problem”, shprehet pacientja.
