Organizata Botërore e Shëndetësisë mirëpret rezultatet e para të testimeve klinike nga Britania e Madhe, që tregojnë se deksametazoni, kortikosteroid, mund të jetë jetëshpëtues për të infektuarit me COVID-19 që janë në gjendje të rëndë shëndetësore. Sipas të dhënave të mëparshme të shpërndara nga OBSH, ventilatorët kanë qenë thelbësorë në trajtimin e pacienteve në terapi intensive, duke ulur rrezikun e vdekshmërisë me rreth një të tretën, ndërsa për pacientët që kanë pasur nevojë vetëm për oksigjen, vdekshmëria ka rënë me rreth një të pestën.
Ilaçi ka rezultuar efikas vetëm për pacientët e sëmurë rëndë me COVID-19, ndërsa nuk është testuar tek pacientët me simptoma të lehta.
“Është trajtimi i parë që ka treguar ulje të vdekshmërisë tek pacientët me COVID-19 që kanë pasur nevojë për oksigjen ose kanë qenë në terapi intensive”, deklaron Tedros Adhanom Ghebreyesus, drejtor i përgjithshëm i OBSH-së.
Deksametazoni është një steroid i përdorur që në vitet ’60 për të ulur inflamacionin e shkaktuar nga disa sëmundje, si çrregullimet inflamatore apo disa lloje kanceri. Është listuar në Listën e Ilaçeve Jetësore të OBSH-së që në vitin 1997, dhe gjendet në çdo vend.
Në ditët në vijim do të dalin edhe rezultatet e plota të testit.
Burimi: OBSH, Përshtati në shqip: Shendeti.com.al
*Njoftimin zyrtar të Organizatës Botërore të Shëndetësisë e gjeni këtu.
