Ministria e Shëndetësisë për katër vitet e ardhshme i është besuar një femre.
Kryeministri i Shqipërisë, Edi Rama prezantoi sot qeverinë e re për mandatin e dytë të qeverisjes. Në krye të Ministrisë së Shëndetësisë dhe Kujdesit Social Rama ka vendosur të emërojë Ogerta Manastirliun, post të cilën ajo e mbajti për gati 3 muaj pas shkarkimit të ish-ministrit Ilir Beqaj.
Pas Anila Godos, Ogerta Manastirliu do të jetë e dyta ministre Shëndetësie, që nga koha e krijimit.
Pas 3 vitesh në krye të QSUT-së, figura e saj u vlerësua për të zëvendësuar ish-ministrin Ilir Beqaj.
Manastirliu mban titullin “Doktor i Shkencave”, në Kimi Analitike dhe Mjedis. Më herët, ajo ka kryer studimet në Fakultetin e Shkencave të Natyrës të Universitetit të Tiranës, ku është diplomuar dhe ka marrë titullin “Master në Shkencë” në degën e Kimisë së Përgjithshme. Prej shtatorit 2013 deri në mars 2017, Manastirliu ka drejtuar Qendrën Spitalore Universitare “Nënë Tereza” në Tiranë. Nga marsi 2017 deri në maj 2017 Manastirliu ka mbajtur postin e Ministres së Shëndetësisë.
