Shqetësimi i ngritur nga gazeta “Shëndet+” në muajin shtator për pacientët e dializës në Lushnjë, pas ankesave të shumta të ardhura në redaksi (lexo këtu), është trajtuar para disa ditësh edhe nga emisioni investigativ “Stop”.
Pacientët ankohen se u kanë ulur ndjeshëm buxhetin për transportin, ku nga 16 mijë lekë të reja që merrnin deri në qershor, tani kjo shumë është ulur në 4 mijë lekë të reja. Aktualisht Lushnja ka 39 pacientë që marrin shërbimin e hemodializës në 4 qytete të ndryshme, si Tiranë, Durrës, Berat e Fier.
Këta pacientë duhet të udhëtojnë tre herë në javë (13 herë në muaj) drejt qyteteve të përcaktuara për të marrë shërbimin e dializës, por, sipas tyre, tarifat e vendosura janë tejet qesharake dhe nuk mbulojnë koston e transportit.
E pyetur nga gazeta “Shëndet+”, drejtoresha e Spitalit Rajonal Lushnje, Panorea Veliu, pati deklaruar se ka nisur disa shkresa ndaj Ministrisë së Shëndetësisë dhe Fondit, ku i ka njohur me problemet e pacientëve dhe përgjigja e tyre ka qenë “Të zbatohet urdhri i ministrit!”
“Unë nuk mund ta shkel urdhrin,- deklaron znj. Veliu,- pavarësisht presionit të pacientëve”.
Të njëjtën gjë ka deklaruar edhe për emisionin “Stop”, ndërkohë që saga e mundimit të pacientëve vazhdon.
“Stop” ka bërë për një ditë provën e udhëtimit me një nga pacientët e hemodializës nga Plugu i Lushnjës në spitalin e Fierit.
Skënderi niset me taksi nga Plugu deri në Lushnjë, pasi fugon nuk ka në atë orar të mëngjesit kur ai niset. Nëse do të niset më vonë, ai nuk kap dot seancën e dializës. Më pas shkon në rotondon e Savrës, nga ku merr fugon për t’u nisur drejt spitalit të Fierit. Gazetarja përllogarit, se kostoja ditore për Skënderin është 1500 lekë të reja dhe për 13 seanca i duhen 19 500 lekë të reja.
Skënderi ka një pyetje për drejtoreshën e spitalit dhe për ministrin Beqaj:
“Shkoj dot unë me 40 mijë lekë të vjetra deri në Fier?”
Shpresojmë që Skënderi dhe shumë pacientë të tjerë si ai të marrin një përgjigje nga ministri Beqaj.
