Blertina Koka, gazeta “Shëndet+”
“Pamje horror brenda maternitetit të Lezhës”. Kështu i ka cilësuar deputeti Eduart Ndocaj kushtet e këtij materniteti në të cilin ka shkuar personalisht dhe ka fotografuar gjithçka. Ndocaj vë në dukje se në maternitet mungon sistemi i ngrohjes, shtretër për pacientët, uji, ilaçet, aparaturat, uniformat e stafit mjekësor.
- Nuk ka asnjë sistem ngrohje në korridoret dhe dhomat e pacienteve. Pacientet kanë blerë me lekët e tyre ngrohëse. Duken qartë edhe në foto.
- Katër shtretër me pacientë në një dhomë të vogël. Siç e shikoni edhe në foto, për shkak të krevatit të katërt nuk mbyllet as dera.
- Ka raste që mungon uji në salla.
- Banjat janë të gjitha të amortizuara. Jashtë çdo standardi higjienik të pranueshëm.
- Dyshekët janë skandalozë, me vite pa larë dhe ndërruar, me vrima sikur të jenë gjuajtur me kallashnikov. Madje edhe tek salla e lindjes, në vendin ku ngrohet fëmija, siç e shikoni edhe ne foto, nuk ka fare dyshekë, por dy sfungjere që janë të papranueshëm.
- Mungesë e ilaçeve. Ato më të rëndësishmet nuk ekzistojnë në spitale dhe pacientët duhet t’i blejnë privatisht jashtë. Për shembull, Oksitonica mungon vazhdimisht dhe thuajse gjithmonë.
- Mungojnë aparaturat e matjes së tensionit, monitori i monitorimit të jetësisë.
P.S. Ishin bërë investime të rëndësishme. Në dhomën ku lahen fëmija e konkretisht aty ku është bërë video e larjes së fëmijës në lavaman, pas skandalit është blerë një kove dhe një kanaçe. Po ashtu me paratë e tyre mjekët dhe infermiret kanë blerë një hekur për hekurosje.
P.S. Uniformat e mjekëve mungojnë ose janë cilësi skandaloze.
Deputeti Ndocaj kohë më parë e ka refuzuar aktivitetin parlamentar duke e konsideruar si humbje kohe, si spektakël turpi. Sipas tij, në atë Parlament vetëm problemet e qytetarëve nuk mbrohen e nuk përfaqësohen.
