Denisa Canameti / Shëndet+
Ministri i Shëndetësisë, Ilir Beqaj dhe kryeministri i vendit, Edi Rama, ishin sot në QSUT për të përuruar Qendrën e Konsultave. Një projekt i qeverisë shqiptare, i Ministrisë së Shëndetësisë, me vlerë 58 milionë lekë. Ky projekt u prezantua vitin e kaluar. Pavarësisht rëndësisë së madhe të kësaj qendre, Ministri ka vendosur të bëjë një inagurim pa bujë. Kështu, në ambientet e QSUT-së ishin vetëm kamerat e TVSH-së.
I shoqëruar nga Ogerta Manastirliu, drejtoresha e spitalit, ministri ka qëndruar disa minuta në ambientet e konsultave për t’u nisur më pas drejt administratës.
Vitin e kaluar, në kohën e prezantimit të projektit, Ministri është shprehur se “me këtë qendër konsultash do të përmirësojmë ndjeshëm cilësinë e shërbimit ndaj qytetarëve, ndaj pacientëve, – nuk do të kemi më sorollatje nëpër pavione, por do të ulim edhe ngarkesën që kanë sot pavionet, brenda të njëjtave hapësira ku ofrohet shërbimi për pacientët që janë të shtruar, por edhe shërbim vizitash ambulatore”.
Ndërsa drejtoresha e QSUT-së, Manastirliu, është shprehur se “nga një godinë e lënë në harresë në gjendje të degraduar, kemi nisur këtë projekt të ri, të qendrës së konsultave, ose të qendrës ambulatore të QSUT-së, një projekt për herë të parë në këto përmasa”.
Ajo shtoi më tej se kjo Qendër “do të përmirësojë shumë shërbimin ambulator mjekësor të QSUT-së, sigurisht do të shmangë ecejaket e pacientëve, që vijnë për një konsultë më të specializuar në qendrën tonë, duke dashur të kontaktojnë mjekun, duke dashur të bëjnë një analizë më specifike për patologjitë e ndryshme që mund të kenë, dhe sigurisht do të përmirësojë fluksin, të gjithë spitalin në konceptin e shtrimit dhe të ambulatorit”./ https://shendeti.com.al/
