Po kërkohen shkaqe për të denigruar e vrarë bluzat e bardha. Kështu shprehet Pëllumb Pipero, ish-drejtori i Politikave Shëndetësore në Ministrinë e Shëndetësisë dhe tashmë mjek pranë spitalit Infektiv në QSUT, në një deklaratë të vetën në 
rrjetet sociale, teksa i referohet rastit të videos së fundit të mjekes së akuzuar për marrjen e një 200-lekëshi. Pas reagimeve të shumta kundër pezullimit të mjekes nga detyra nga një video që tregonte më tepër kërcënimin e mjekëve sesa korruptimin, Pëllumb Pipero, thotë:
“Është i patolerueshëm korrupsioni (më saktë percepsioni për korrupsionin alla 200-lekësh të bluzave të bardha) kudo që mund të shfaqet. Por është kriminale t’i provokosh mjekët me një 2000-lekësh të vjetër dhe Ministria e Shëndetësisë dhe qeveria të bëjë sehir e të gjejë shkak për të denigruar, sulmuar, baltosur e vrarë bluzat e bardha.
“Vallë ku po shkoni dhe ku po e çoni këtë vend? Doni ta lini fare pa mjekë, pa këta shërbëtorë (në kuptimin më të mirë të fjalës) të shëndetit të qytetarëve? Vallë me kë dhe si do e mirëmbani shëndetin tuaj dhe të popullit apo duke sulur popullin në emrin tuaj për të vrarë mjekët, si dikur ju (domethënë ata), duke vrarë në emër të popullit?!”
