Një tjetër ngjarje e rëndë ka ndodhur në maternitetet shqiptare. Një foshnjë vetëm 2-ditëshe ka ndërruar jetë në Pogradec, ndërsa policia ka nisur procedimin penal ndaj mjekut për “Mjekimi i pakujdesshëm”.
Ngjarja e rëndë ka ndodhur ditën e djeshme, ndërsa për mjekun pediatër, N.E, 52 vjeç, policia ka nisur procedimin penal në gjendje të lirë.
Babai i foshnjës, 33-vjeçari A.H, pretendon se vdekja e djalit të tij, ka ardhur si pasojë e mjekimit të pakujdesshëm nga ana e mjekut.
Nga këqyrja e jashtme e kufomës nuk dallohen shenja ose probleme, ndërkohë pritet kryerja e autopsisë nga ekspertë të Institutit të Mjekësisë Ligjore Tiranë. Pak orë pas lindjes, mjekët u kishin thënë se foshnja ishte mirë, por më pas i lajmëruan se ndërroi jetë.
Kjo ngjarje e rëndë në Pogradec, vjen vetëm disa ditë pas asaj që ndodhi në maternitetin “Koço Gliozheni”, ku nëna dhe foshnja e saj humbën jetën. / shendeti.com.al
