Denisa Canameti
Muaji tetor është një muaj ndërkombëtar dedikuar kancerit të gjirit. Kanceri i gjirit mbetet një sëmundje e rrezikshme, por fatmirësisht mund të trajtohet dhe të evitohen pasojat në rast se diagnostikohet herët.
Poliklinika e Specialiteteve nr. 3 në Tiranë edhe këtë vit ofron depsitim falas për të gjitha gratë. Drejtoresha e kësaj poliklinike, Valdete Malaj, shpjegon se institucioni që ajo drejton është gjithmonë i hapur për të pritur të gjitha femrat që kërkojnë të bëjnë këto ekzaminime falas. Në një prononcim për “Shëndet+” ajo përfiton për t’u bërë thirrje të gjitha grave dhe vajzave që të drejtohen për të bërë mamografitë dhe ekot e gjirit pasi ky mund të jetë shpëtimi i vetes.
E pyetur nëse ka pasur një shtim të fluksit të pacienteve gjatë këtij muaji, Malaj pohon duke treguar që fluksi sa vjen e shtohet, gjë që tregon për një sensiblizim akoma më të madh të popullatës për risqet që mbart kjo sëmundje.
Vitin e kaluar Ministria e Shëndetësisë bëri një fushatë të madhe në kuadër të sensibilizimit dhe depistimit të popullatës femër duke vënë në dispozicion mamografë lëvizës dhe ofrimin falas të tyre nëpër Qendra Shëndetësore.
