Diagnostikimi me prediabet nuk do të thotë se pacienti do të zhvillojë patjetër diabet të tipit 2. Përkundrazi, kjo fazë mund të jetë një mundësi e rëndësishme për të ndërhyrë në kohë dhe për të parandaluar përparimin e sëmundjes.
Mjekja endokrinologe Bariola Duro, e ftuar në ciklin e podcasteve “Obeziteti, le të flasim për të”, ka shpjeguar se çfarë duhet të bëjë një pacient pasi diagnostikohet me prediabet.
Sipas saj, hapi i parë është konsultimi me mjekun endokrinolog, pasi gjendja duhet vlerësuar në tërësi dhe jo vetëm përmes nivelit të sheqerit në gjak.
“Duhet bërë një vlerësim i pacientit jo vetëm në pjesën e sheqerit të lartë, por duhet bërë një vlerësim i peshës, i lipidogramës, pra nivelit të yndyrave në gjak. Duhet parë pak më gjerë”, u shpreh Duro.
Në vlerësimin e pacientit, sipas mjekes, rëndësi kanë edhe sëmundjet shoqëruese, si tensioni i lartë i gjakut apo sëmundjet kardiovaskulare, si dhe historia familjare e diabetit. Këta janë disa nga faktorët që mund të ndikojnë në rrezikun e përparimit nga prediabeti drejt diabetit të tipit 2.
Ndryshimi i stilit të jetesës, kyç në parandalim
“Është një dritare shumë e rëndësishme, kur ne mund të ndërhyjmë me modifikimin e stilit të jetesës që prediabeti ta kthejë pacientin në normë dhe të mos avancojë drejt diabetit të tipit të dytë”, theksoi mjekja.
Një nga elementet më të rëndësishme është rënia në peshë, e cila arrihet përmes një stili jetese më të shëndetshëm, ushqyerjes së balancuar dhe rritjes së aktivitetit fizik.
Sipas Duro, edhe një humbje prej 5–10% të peshës trupore mund të ketë ndikim të rëndësishëm në përmirësimin e vlerave të sheqerit në gjak dhe, në disa raste, të ndihmojë në rikthimin e tyre në normë.
