Elona Tereziu / Shendeti.com.al
Të amortizuara ose jo, në qendrat shëndetësore të kryeqytetit është e pamundur të mos gjesh një pajisje që nuk funksionon. Aktualisht, në Qendrën Shëndetësore Nr. 3 laboratori i analizave të gjakut ka pothuajse tre javë që nuk funksionon.
Në raste të tilla, kjo qendër mbulohet nga Poliklinika Qendrore, por sipas burimeve të brendshme, ende nuk ka asnjë shkresë zyrtare për kalimin e pacienteve atje. Në kushte të tilla, pa rekomandim, pacientët e Qendrës Shëndetësore nr. 3 detyrohen të paguajnë 500 lekë për të kryer një analizë, e cila në kushte të tjera, me rekomandim do t’u kushtonte vetëm 100 lekë.
Gazeta “Shëndet+” ka denoncuar dhe më parë raste të ngjashme të prishjes së aparaturave nëpër qendrat shëndetësore, të tilla si sonda abdominale dhe spirometri në Poliklinikën e Specialiteteve Nr. 1, të cilat vazhdojnë të jenë të prishura, edhe pse ka kaluar më shumë se dy muaj që nga prishja e tyre.
Në raste të tilla, ku riparimi dhe vënia në punë zgjat me muaj, pacientëve u duhet të sorollaten lart e poshtë për të bërë një analizë./ https://shendeti.com.al/
