Ministria e Shëndetësisë nuk pranon të prononcohet për koncensionin e laboratorëve të spitaleve. Kërkesës së gazetës “Shëndet+” për të marrë një informacion të mëtejshëm lidhur me faktin se si do të realizohet ky koncension, zëdhënësja për shtyp i përgjigjet: “Pasi u shqyrtua kërkesa juaj në 
Kabinetin e Ministrit, u vlerësua se nuk ka komente për çështjen në fjalë për të cilat mund të prononcohemi”.
Koncensioni i laboratorëve të spitaleve, i deklaruar nga ministri nënkupton një centralizim të shërbimit laboratorik në gjithë Shqipërinë. Kjo nënkupton që tashmë spitalet shtetërore nuk do të njohin asnjë përgjigje tjetër laboratorike nga klinikat private, ndërsa të gjithë laboratorët do të jenë në dorën e një koncensionari të vetëm.
Megjithëse është detyrim i Ministrisë së Shëndetësisë që të japë informacion lidhur me këtë çështje, sërish vazhdon të heshtet në këtë drejtim. Kështu ministria ka zgjedhur që të vazhdojë të veprojë pa dijeninë e publikut, pavarësisht se të gjitha paratë që do të përdoren në këtë drejtim janë të taksapaguesve shqiptarë. D.C.
