Denisa Canameti
Mund të thuhet pa frikë se mjekësia jonë aktualisht është zhytur në një kaos shumë të madh. Jo rrallëherë është vënë në pikëpyetje profesionalizmi dhe etika e mjekëve tanë. Pavarësisht kësaj, shqiptarët e Kosovës edhe për një konsultë të thjeshtë vendosin të vijnë në Shqipëri. Jo vetëm për një mendim të dytë, por sepse nuk kanë më asnjë lloj besimi tek mjekësia e tyre.
Sot në dyert e Spitalit të Traumës trokitën 3 kosovarë. Njëri prej tyre i pyetur nga gazeta “Shëndet+” se pse ka zgjedhur të vijë këtu, shprehet:
“Mjekësia kosovare ka vdekur. Ashtu sikurse shumë gjëra të tjera në Kosovë. Është keq kur mjekësia kthehet në biznes. Është bërë e frikshme të hysh në dyert e spitaleve. Nuk e harroj para disa viteve, në 2006-n, vëllai dëmtoi 2 gishta në punë dhe e çuam në spitalin e Kosovës. Ata ia prenë direkt njërin gisht, donin të bënin të njëjtën gjë me gishtin tjetër, por kërkuam që të vijmë në Tiranë për trajtim. Vëllai edhe sot e ka gishtin, ndërkohë që na thanë që, nëse do të kishte ardhur në kohë, do ta kishte edhe gishtin tjetër.
“Por jo vetëm kjo. A e di sa paguam për gishtin që i prenë vëllait? 800 euro. Për të bërë një konsultë të thjeshtë me mjekun në Kosovë, duhet të paguash 20 euro. Pa llogaritur ekzaminimet e tjera që duhen. Mjekësia është katastrofë atje. Nuk gjendet asnjë medikament. Nuk ka rregull, as asgjë. Ndaj njerëzit kanë humbur besimin”.
I pyetur nga gazeta “Shëndet+”, mjeku gastroenterolog Ilir Kajo, shef shërbimi në Spitalin e Traumës, thotë se në këtë spital paraqiten shumë njerëz që vijnë nga Kosova.
