Shefja e Departamentit të Epidemiologjisë dhe Kontrollit të Sëmundjeve Infektive në ISHP, Silva Bino ka shpjeguar procedurat e ceremonisë mortore për personat që kanë humbur jetën nga koronavirusi.
Në një deklaratë për mediat, Bino theksoi se për të gjithë personat që humbin jetën nga sëmundjet infektive ka një ligj të veçantë për varrimin.
Sipas saj, një prej rregullave të parashikuara në ligj është se nuk lejohet të hapet arkivoli.
“Sa i përket të vdekurve, që humbin jetën nga sëmundjet infektive ka një ligj të përcaktuar dhe varrimi dhe arkivoli dhe të gjitha masat merren në bazë të këtij ligji, si psh arkivoli nuk hapet, pra janë disa rregulla të përcaktuara të varrimit”, tha Bino.
Kujtojmë këtu që numri i viktimave nga koronavirusi në vend ka shkuar në 5, ndërsa numri i të infektuarve ka arritur në 123.
