Bisedoi: Denisa Canameti, gazeta Shëndet + dhe Shëndeti Online
“Është shumë problematike se si po rritet brezi i ri, – shprehet psikologia Milena Turtulli për gazetën “Shëndet +”. – Është një brez i bombarduar me premisa dhune, qoftë në filma, qoftë në këngë. Nuk ka filtra që të ndalojë aksesin e fëmijëve në këto lloj filmash. Shkolla nuk po bën asgjë në këtë drejtim. Çfarë mund të bëjë një mësuese që ka 40 nxënës në klasë kur nuk arrin të mbyllë programin?”
Sipas psikologes, dy prindër të arsimuar, të punësuar, me më pak stres nga ana financiare, pa diskutim që do të kenë më shumë mundësi dhe më pak stres në gjetjen e alternativave edukuese të fëmijës. Gjithsesi ajo nuk e konsideron varfërinë si të vetmen shkaktare.
“Sigurisht, varfëria i rëndon të gjitha situatat. Por jo të gjitha krimet ndodhin në familjet e varfra. Sepse njerëzit, pavarësisht se mund të jenë me të njëjtin status socio-ekonomik, i përballojnë ndryshe problemet. Duhet të punojmë shumë në drejtim të formimit të brezit të ri”.
Duhen rritur masat e ndëshkimit për dhunuesit
Nga ana institucionale, mënyra sesi shteti merret me dhunuesit, duhet të jetë më serioze. Një urdhër mbrojtjeje është një copë letër nëse ai urdhër nuk monitorohet. Në rastin e një të dhunuare që rri në një çati me dhunuesin, pa diskutim që situata do të degjenerojë në dhunë. Duhen rritur masat e ndëshkimit për dhunuesit. Edhe mënyra se si reagojmë nga këtyre fenomeneve është e dhunshme.
