Pyetje e ardhur në info@shendeti.com.al/ Fb: Gazeta Shëndeti
Më jepni ndonjë këshillë çfarë mund të bëj që të shëndoshem, ju lutem. Jam 17 vjeçe, e fejuar por jam shumë e dobët. Më vjen turp të dal jashtë shtëpisë që mos të më shikojë njeri, sepse më duket vetja shumë keq. Jam 1.65 e gjatë dhe jam 47 kg. S’kam asnjë shqetësim nga trupi. Thjesht jam e dobët dhe 
dua të shëndoshem. Kam marrë vitamina në farmaci. I konsumova ato por nuk më dhanë asnjë rezultat. Jam e njëjta mbasi piva vitaminat.
Përgjigjet për gazetën “Shëndet+” dietologia Rolina Naco
Si fillim do të doja të thoja se duke qenë se jeni 17 vjeçe, trupi juaj e përdor energjinë e marrë nga ushqimi jo thjesht për nevojat ditore, por edhe për zhvillimin e trupit, pasi jeni ende në proces rritjeje. Rreth moshës moshës 18-19 vjeç ky proces fillon të ulet ose të ndalojë dhe kjo është koha kur ju mund të shtoni më shumë peshë.
Pas plotësimit të zhvillimit, trupi ynë ka nevojë për energji thjesht për të plotësuar nevojat ditore të trupit (metabolizmi) dhe të sasisë kalorike që ne djegim në bazë të aktivitetit fizik që kemi. Atëherë është edhe më e lehtë për të vënë disa kile më shumë, nëse jemi shumë të dobët.
