Elona Tereziu, gazeta “Shëndet+”
Qendra e Specialiteteve Nr.1 në Tiranë, ose siç njihet ndryshe ”Iraniani”, përveç kushteve të rënda higjieno-sanitare që ofron me qendrën e improvizuar për qytetarët e njësisë bashkiake 1 dhe 2, ofron edhe vonesa të mëdha për të kryer një analizë.
Ismete Xhaçka,78 vjeçe, thotë për gazetën “Shëndet+” se për të kryer një analizë gjaku komplet, iu desh të presë 20 ditë, pasi takimin e kishte rezervuar që më datë 29 janar, ndërkohë që datën ia kishin caktuar më 19 shkurt. Sot ajo kishte një takim tjetër, ndërsa vizita e radhës do ta jetë 10 ditë më pas.
”Unë jam 78 vjeçe dhe kam më shumë se tre orë që pres mes njerëzve duke u zënë e shtyrë për radhën. Po më merret fryma këtu, se jam dhe me zemër e tension. Qendrën time e kam tek Porcelani, atje vizitohem, por analizat e gjakut na dërgojnë t’i bëjmë këtu. E kisha pronotuar vizitën më 29 janar, por ma caktuan më 19 shkurt, takimin e radhës e kam pas 10 ditësh, me datën 19 hajde përsëri më thanë. Këtu vdes e ngjallesh duke pritur një analizë.”
Mjafton të bësh një vizitë në këtë qendër dhe do të kuptosh se përse data duhet caktuar 20 ditë para. Nëpër korridoret e qendrës përveç pacientëve që shtyhen e ulërasin se kush ishte i pari e kush i fundit, të zënë sytë objekte nga më të çuditshmet. Për më tepër flasin fotot.
