Infeksionet Nozokomiale: Sfidë drejt një shëndetësie më moderne
Komiteti i Kontrollit të Infeksioneve Spitalore të QSU “Nënë Tereza” është një strukturë e rëndësisë teknike përgjegjëse për parandalimin dhe uljen e infeksioneve spitalore, e cila rifilloi funksionimin e saj pas disa vitesh mungesë.
Në mbledhjen e parë të këtij komiteti, ishin të pranishëm mjekë të specialiteteve të ndryshme dhe drejtuesit më të lartë të QSUT, nën cilësinë e anëtarëve të komitetit.
Infeksionet Nozokomiale, konsiderohen sot tregues të cilësisë së shërbimeve të ofruara në një spital apo çdo institucion tjetër shëndetësor. Në këtë kuadër, QSUT ka për synim të përcaktojë objektiva konkretë rreth të cilave, do të përqendrojë përpjekjet për parandalimin dhe uljen e këtyre infeksioneve, do të caktojë ekipet e profesionistëve përgjegjës për të siguruar zbatimin me rigorozitet dhe monitorimin e ecurisë së procesit, si edhe ndërgjegjësimin e strukturave në të gjitha nivelet duke dërguar një mesazh të qartë mbi parimet e higjienës dhe konceptit të mbrojtjes, prej infeksioneve.
Komiteti do të përmbushë këto funksione:
– Të hartojë politikat spitalore për parandalimin dhe uljen e infeksioneve në shërbime;
– Të përgatisë një strategji të luftës kundër infeksioneve spitalore, përfshirë edhe survejancën epidemiologjike;
– Të hartojë standarde për proçedurat e punës në sallat operatore dhe ambientet e tjera, bazuar në normat për garantimin e higjienës dhe sterilitetit në shërbime;
– Të verifikojë zbatimin efektiv të masave të propozuara për parandalimin dhe uljen e infeksioneve spitalore, si dhe të raportojë periodikisht pranë drejtorisë;
– Të bëjnë propozime për masa të menjëhershme operative, sa herë identifikon problematika apo situata me risk për infeksione;
– Të hartojë një politikë spitalore për përdorimin e antibiotikëve;
– Të ofrojë trajnime të vazhdueshme të personelit spitalor mbi këto çështje;
– Të hartojnë materiale informuese dhe ndërgjegjësuese.
Programet e kontrollit dhe parandalimit të infeksioneve spitalore përmbushin, jo vetëm qëllimin që lidhet më një përkujdes të orientuar dhe të fokusuar tek pacienti, por kontribuojnë gjithashtu në mbrojtjen e stafit mjekësor dhe përkujdesjes shëndetësore ndaj vizitorëve, studentëve dhe të gjithë atyre në kontakt me këto mjedise. Nëpërmjet këtij programi efikas, do të sigurohet edhe një trajtë e drejtë kosto-përfitimi.
