Elona Tereziu, gazeta “Shëndet+”
Policia e Rendit ka zhvilluar një aksion gjatë ditës së sotme në ambientet e QSUT, duke nisur që me dëbimin e endacakëve dhe me largimin e tregtarëve ambulantë, të cilët me rritjen e temperaturave sa vijnë e shtohen. Por ajo çka ra në sy, ishte morali i lartë i “çunave” të cilët, me këtë rast, nuk kanë ngurruar t’u japin leksion edhe sanitareve.
“Fatin” e ka pasur Nexhmija, një ndër sanitaret më të vjetra në QSUT, e cila po pastronte shkallët e Spitalit të Sëmundjeve të Brendshme. Një kosh i lënë për pak minuta në shkallë, ka bërë që policët të ngrenë tonet ndaj sanitares, duke mos ia kursyer “këshillat”.
“Unë e shkreta punën po bëja, s’jam e re këtu që më mësojnë këta”, u shpreh nënë Nexhmija, e cila tregon që nuk ka pak që punon këtu, por mbi 10 vjet.
Ndërkohë, nga ana tjetër tregtarët ambulantë pohojnë se janë në dijeni që nuk është e lejueshme të shesësh pranë QSUT-së, por që nuk kanë çfarë të bëjnë: “Do jetojmë dhe ne”, thonë ata.
