Ushqyes apo kancerogjen? Kjo është pyetja që ngrihet sot në gjithë botën pas deklaratës së Organizatës Botërore të Shëndetit e cila dha alarmin se ngrënia e mishit të përpunuar, si salçiçet dhe proshutat shkaktojnë kancer. Këtij alarmi i është përgjigjur edhe vendi ynë. Instituti i Shëndetit Publik lajmëron se do të nisë së shpejti një analizë risku për të parë situatën në të cilën gjendet vendi ynë.
Pas raportit të Organizatës Botërore të Shëndetësisë, Instituti i Shëndetit Publik në vendin tonë vihet në lëvizje për të verifikuar rrezikun e shkaktimit të kancerit nga mishi i papërpunuar që tregtohet në vendin tonë.
Në një intervistë për “Ora News”, drejtorja e Sigurisë Ushqimore në Shëndetin Publik, Jolanda Hyska, shprehet se së shpejti do të ngrihet një grup pune për këtë qëllim.
Jolanda Hyska: Në nivelin tonë kombëtar duhet të bëhet një analizë apo një vlerësim më i thelluar i riskut lidhur me konsumin e mishit apo efektet në shëndet. Nuk do kërkojë vetëm ekspertët e ISHP-së, por dhe ekspertë të tjerë të cilët do japin kontributin e tyre për një vlerësim sa më objektiv të riskut që popullata shqiptare mund të mbartë.
Hyska është sinkron me raportin e publikuar kur konfirmon se ngrënia e mishit të përpunuar, si salçiçet dhe proshutat janë shkaktare të kancerit, por edhe konsumi i tepërt i mishit të kuq të papërpunuar mund të jetë gjithashtu kancerogjen.
Ajo që më tërhoqi vëmendjen ishte dhe klasifikimi i mishit të kuq në grupin 2A, që do të thotë se tashmë ka një lloj evidence, gjithmonë të limituar, gjithmonë referuar deklaratës, sa i përket efektit kancerogjen tek mishi.
Nga ana tjetër konsumatorët shqiptarë ndihen të frikësuar dhe të pasigurtë për produktet që konsumojnë. Ndonëse ka nga ata që nuk besojnë fort tek hulumtimet e studiuesve.
Por konstatimi i OBSH ka hasur edhe kundërshtitë e kompanive industriale të mishit. Sipas medias prestigjoz,e BBC, kompanitë i janë kundërvënë OBSH-së duke e quajtur raportin e saj si tendencioz dhe keqorientues. Shoqata Kombëtare e Mishit të Kuq u shpreh se shkencëtarët që punuan për të nxjerrë këtë raport ishin të vendosur për të gjetur një lidhje mes kancerit dhe mishit të kuq.
