Kryeministri Edi Rama dhe ambasadori amerikan Aleksandër Arvizu morën pjesë sot në mesditë në ceremoninë e përurimit të zyrave të pritjes pranë spitalit të Lezhës. Ky investim vjen në kuadrin e projektit të financuar nga USAID, “Mbështetje e Reformës në Shëndetësi”, i pasqyruar rregullisht nga gazeta “Shëndet+” në çdo fazë të tij.
Në fjalën e tij, Rama theksoi se ky projekt është shembulli i parë i transformimit të pikave të kontaktit të shtetit me qytetarët. Sipas tij, mjekët dhe infermierët janë të kënaqur nga pagat me taksimin e ndershëm. “Ky është një fillim i ri për sistemin shëndetësor”, u shpreh kryeministri. Ai deklaroi se qeveria do të vazhdojë të mbështesë shëndetësinë duke e quajtur taksimin progresiv një të mirë që u është bërë mjekëve.
“Ky është një fillim i ri për sistemin shëndetësor, ku tashmë qytetarët do të marrin një shërbim më të mirë. Sot shikoj fytyra të qeshura të mjekëve, pasi ka filluar taksimi i ndershëm dhe, siç duket, mjekët janë të kënaqur. Ne me politikat tona do vazhdojmë të mbështesim sistemin shëndetësor me qëllim që ai të ndryshojë”, tha Rama.
