Pas ditësh të tëra debat për zhvillimin e një seance dëgjimore me ministrin Beqaj lidhur me kontrollin shëndetësor falas, debati u zhvendos në Komisionin e Shëndetësisë. Përplasja opozitë-mazhorancë erdhi përmes akuzave dhe mosbesimit të opozitës ndaj informacionit të mundësuar nga ministri Ilir Beqaj.
Pasi deklaroi se e kishte njoftuar prej ditësh të paraqitej në Komisionin e Shëndetësisë, për të dëshmuar lidhur me kontrollin falas të shëndetit, kryetarja demokrate Albana Vokshi e pyeti ministrin Beqaj lidhur me studimin mbi të cilin është bazuar kontrata me kompaninë koncesionare.
Dokumentacionin e kërkuar nga komisioni, ministri Ilir Beqja thotë se gjendet në faqen web të ministrisë që drejton. Pyetjes për ekzistencën e një studimi mbi të cilin është bazuar kontrata koncesionare, Beqja i referon relacionin e vendimit të këshillit të ministrave, ndaj pyetjen ia shtruan ndryshe.
Pasi shpjegoi se volumi vjetor prej 475 mijë personash ishte i domosdoshëm nga ana logjistike për të përballuar ushtrimin financiarisht, ministri dha shifrat e kërkuara.
Edhe pse deklaron se shifra dysheme prej 475 mijë pacientësh erdhi për arsye logjistike financiare për përballimin e projektit, duke lënë të mendohet se buxheti për shifrën dysheme është shpenzuar, ministri deklaron se me rritjen e fashës së moshës që përfiton nga ky shërbim, buxheti nuk do të rritet.
Me fashën e re 310 mijë vetë më shumë mund të kontrollohen. Parashikohen 550 mijë kontrolle.
Kaq mjaftoi që opozita, përmes kryetares së komisionit Albana Vokshi, ta akuzojë ministrin Beqaj se i bëhet zëdhënës kompanisë koncesionare.
Sipas opozitës, paratë e paguara ndaj kompanisë koncesionare për 110 mijë pacientë më shumë nga taksat e shqiptarëve, duhet të ishin kthyer. Si faktor në shifrat e ulëta të kontrollit shëndetësor, ministri Beqja nuk harron të ripërsërisë dhe akuzën e mazhorancës, e cila i vesh demokratëve fajin e numrit të ulët të kontrolleve. Për socialistët ky është edhe rezultat i propagandës kundër check-up të drejtuar nga selia blu./Abc News
