Fëmijëve me leucemi iu kthehet buzëqeshja dhe bashkë me buzëqeshjen, edhe shpresa për jetën. Pas disa muajsh mungesash, tashmë ata mund të marrin mjekimin e domosdoshëm.
Pas protestave të vazhdueshme të shoqatës “Together for Life” në mbështetje të fëmijëve me leucemi, ngritjes së zërit në mënyrë institucionale, nga ana e QSUT-së më në fund është gjetur zgjidhja. Burimet zyrtare të këtij institucioni konfirmojnë për gazetën “Shëndet+” se medikamenti L-Asparaginase, tepër i nevojshëm për fëmijët, është arritur të sigurohet.
Deklarata e shoqatë “Together for Life” dhe KSHH në kërkim të zgjidhjes së çështjes së medikamentit
Reagimi i QSUT-së vjen një muaj pas thirrjes së organizuar nga shoqata “Together for Life” me prindërit e fëmijëve të sëmurë me leucemi, më 13 korrik. Ndërkohë nga shoqata “Together for Life” dhe Komiteti Shqiptar i Helsinkit tre ditë më parë u dha një deklaratë për shtyp në të cilën iu bë thirrje institucioneve shëndetësore që të gjenin zgjidhje të menjëhershme për sigurimin e ilaçit L-Asparaginase për fëmijët e sëmurë me leucemi. Vetëm dy ditë më parë këto dy organizata i dërguan komisioneres kundër diskriminimit që të fillonte hetimin për këtë çështje.
Zgjidhja e këtij problemi, sipas burimeve zyrtare, deri në fund të vitit, është një arritje e madhe për jetën dhe shëndetin e fëmijëve dhe për dëgjimin e zërit të tyre.
