Nga dermatologia Ardiana Sinani:
Rënia e flokëve në formë difuze (telogen effluvium): Kur flokët fillojnë të na bien më shumë se normalisht (më shumë se 100 fije në ditë), flokët fillojnë të na rrallohen e të humbasin vitalitetin e tyre.
Shkaqet më të shpeshta të kësaj rënie janë:
Defiçiencat ushqimore që vijnë si rezultat i një mënyrë ushqyerje jo të shëndetshme, mungesa e fibrave, vitaminave, mineraleve, që përgjithësisht gjenden në perimet dhe frutat, mbajtja e dietave të forta për periudha të gjata kohe.
Shkaqe endokrinologjike, si hipo ose hipertiroidizmi, mbas lindjes së një fëmije. Kjo vjen si rezultat i proceseve të shumta mitotike që ndodhin gjatë shtatzanisë. Flokët gjatë kësaj periudhe nuk bien. Por pas lindjes të gjitha ato flokë që normalisht duhet të kishin rënë, fillojnë e bien njëherësh (rreth 3-4 muaj pas lindjes).
Një shkak tjetër është edhe stresi i madh psikik dhe ai fizik.
Anemitë, sidomos ato ferriprive, që vijnë si rezultat i marrjes së paktë të hekurit apo humbjes së tij nga oragnizmi ,siç janë hemorragjitë e ndryshme.
Shkaqe të tjera janë infeksionet e përsëritura streptokoksike të fytit, hundës, veshëve etj.
Vendet ku më shpesh vihet re rrallimi i flokëve, janë në pjesën e sipërme të kokës dhe anash saj.
Cilit mjek duhet t’i drejtohemi për të gjetur shkakun e kësaj rënie?
E mira është që përpara se të shkojmë nëpër qendra estetike dhe të trajtojmë këto rënie, të kontaktojmë me mjekun dermatolog. Kjo për të gjetur shkakun e kësaj rënieje, të cilat siç u përmendën më lart, janë të shumta. Pa mjekuar shkakun, ne nuk ndalojmë dot rënien e tyre, pavarësisht trajtimeve të jashtme që mund të bëhen për flokët, si maska apo produkte të tjera kozmetike.
Si realizohet trajtimi i flokëve?
Trajtimi i flokëve bëhet i kombinuar me terapi orale (që lufton shkakun) dhe aplikimin e produkteve kozmetike për flokët.
Kujdes duhet treguar me aplikimin pa kriter të këtyre produkteve. Larjet e shpeshta, përdorimi i procedurave kozmetike, si tharjet e shpeshta me tharëse, aplikimi i produkteve për të shtrirë apo për t’i bërë kaçurrela, ekspozimi për periudha të gjata në diell e thajnë dhe e hollojnë flokun.
Gjithashtu mjaft e efektshme (gjithmonë pasi është gjetur shkaku i rënies) sot rezulton edhe aplikimi direkt në lëkurën e kokës e solucioneve multivitaminave nëpërmjet mesoterapisë apo aplikimi i plazmës së koncentruar me faktorë rritje të marrë nga gjaku i vetë pacientit (autohemoterapia autologe).
