Artisti i Popullit, aktori i madh Robert Ndrenika po mjekohet në spital për zemrën. Aktori 73-vjeçar po merr kurat e zakonshme për problemet në zemër pasi ndodhet para një by-pass-i. Momentalisht Ndrenika po ndiqet nga shefi i kardiologjisë në QSUT, Tiranë, Artan Godo.
Nga persona brenda spitalit mësohet se Robert Ndrenika nuk ka pranuar të kërkojë një trajtim si person i veçantë, pavarësisht të qenët një artist i madh.
“Ndrenika ndodhet në dhomë me të afërmin tim. Më duhet të shpreh keqardhjen për mungesën e vëmendjes ndaj artistëve shqiptarë. Për ato kushte që ofron QSUT, shteti duhet t’i siguronte një mundësi trajtimi jashtë vendit, por i madh Ndrenika s’kishte pranuar ta lypte një gjë të tillë. Urojmë shërim të shpejtë për këtë legjendë ende mes nesh”, shprehet për “Shëndet+”, një nga familjarët e pacientëve në repartin e Kardiokirurgjisë.
