Për shendeti.com.al, Petrit Drini, fizioterapist
Rekomandohet që në ditët e para pas shfaqjes së dhimbjes të bëhet pushim, përdoren medikamente si qetësues dhe antiinflamatorë dhe fillimi i fizioterapisë kryesisht nis me terapinë TENS. Në një fazë të dytë, kur dhimbja të jetë reduktuar pjesërisht, vazhdohet trajtimi me fizioterapi me objektiv kthimin e fleksibilitetit të shtyllës kurrizore, kthimin e funksionalitetit të plotë dhe stabilitetin, përgatitja e masës 
muskulare për të qenë në gjendje të përballojë aktivitetin e përditshëm fizik.
Metodat e përdorura janë metoda MekKenzi, Mezier, Souchard: ushtrime specifike për grup muskuj që stabilizojnë pjesën lumbare.
Në rastet ekstreme të stenozave të avancuara lumbare ose hernies së avancuar lumbare, zgjidhja e vetme mbetet ndërhyrja kirurgjikale. Pas ndërhyrjes kirurgjikale gjithmonë vazhdohet me rehabilitim fizioterapik.
Kohëzgjatja e trajtimit fizioterapi varion nga 5-7 ditë për lombalgjinë akute në 3-4 javë për lombalgjinë kronike. Frekuenca e seancave fizioterapike varion nga 2-3 seanca në javë. Garancia e ruajtjes së gjendjes së mirë shëndetësore për pacientët që kanë vuajtur më përpara nga dhimbja e mesit mbetet rivlerësimi i stilit të jetës, zakoneve të jetës së përditshme dhe lloji të punës. Disiplina në bërjen e ushtrimeve të mesit, luftimi i mbipeshës, bërja sport dhe një ekuilibër i mirë psiko –emocional do të garantojnë një funksionim të mirë të kolonës dhe mesit në përgjithësi.
