Ministrja e Shëndetësisë, Ogerta Manastirliu gjatë inspektimit në Qendrën Shëndetësore nr. 8 në Tiranë, ka bërë me dije që Komiteti Teknik i Ekspertëve anti-COVID ka marrë vendimin që të bëhet e detyrueshme për çdo qytetar mbajtja e maskave mbrojtëse në ambiente të mbyllura.
”Maskat ose barrierat e mbrojtjes prej tekstili do të jenë të detyrueshme të mbahen në ambientet e mbyllura nga çdo qytetar. Me vendimin e Komitetit Teknik të Ekspertëve kemi vendosur që maskat/barrierat mbrojtëse, ashtu siç i kemi përcaktuar të jenë të detyrueshme në transportin publik apo në aktivitetet me rrezikshmëri të lartë, tashmë do të jenë të detyrueshme për të gjithë individët për t’u përdorur në ambientet e mbyllura”, deklaroi ministrja.
Ministrja Manastirliu u ka bërë apel të gjithë qytetarëve të respektojnë rregullat, për të kufizuar përhapjen e COVID19.
“Kërkojmë mirëkuptimin e qytetarëve për ta zbatuar këtë masë, sepse, shëndeti nuk ka çmim! Më parë maska ka qenë e detyrueshme për subjektet, tashmë do të jetë edhe për qytetarët.
Do të jetë një përgjegjësi më shumë e të gjithë qytetarëve, për të mbajtur barrierat mbrojtëse, kudo në ambientet e mbyllura. Të gjithë ata individë që nuk do ta përdorin barrierën mbrojtëse, sipas udhëzimeve të Ministrisë së Shëndetësisë, do të penalizohen”, u shpreh më tej ministrja e Shëndetësisë, ndërsa nuk dihet nëse ajo që propozon Manastirliu do të aplikohet dhe nga vetë krerët e politikës, të cilët i kemi parë shpesh që të mos zbatojnë rregullat e distancimit.
