Denisa Canameti
Dera e mjekut androlog, Evin Dani, në Poliklinikën e Specialiteteve nr. 3 në Tiranë është gjithmonë plot. Pavarësisht se në 
periudhë pushimesh, aty “gëlon” nga pacientët. Fillimi i marrëdhënieve seksuale në moshë shumë të re, shtimi i sëmundjeve seksualisht të transmetueshme apo ndërgjegjësimi për probleme të tjera që dikur “injoroheshin”, ka bërë që pacientët të interesohen më tepër për veten në këtë drejtim.
Ndodh që pjesa më e madhe e pacientëve të vijnë pa letër rekomandimi apo librezë. Pavarësisht kësaj ato nuk kthehen mbrapsht. Mjeku Evin Dani thotë se i mirëpret të gjithë pacientët, sepse është i ndërgjegjshëm se ardhja në derën e tij duhet të jetë konfidenciale. Për më tepër, vajtja te mjeku i familjes për të kërkuar një rekomandim për tek andrologu është i vështirë për shumicën e njerëzve. Pasja e vetëm tre andrologëve në gjithë Shqipërinë vazhdon të mbetet një problem në vendin tonë.
Megjithatë, një gjë mund të thuhet me shumë siguri, seksi nuk është më tabu. Problemet në çift janë probleme që mund të dalin edhe jashtë dhomës së gjumit. Kjo ka ndihmuar shumë çifte të kenë një aktivitet seksual shumë të mirë dhe si rrjedhojë një jetë më të lumtur.
