Në datat 19-21 mars në Tiranë u zhvillua panairi i shëndetësisë “Medical Expo”, në të cilin mori pjesë edhe gazeta “Shëndet+”. Shumë njerëz ishin të interesuar për të mësuar lidhur me shëndetin dhe shumë prej tyre iu drejtuan stendës së “Shëndet+” për të marrë një informacion më të gjerë.
Mes tyre nuk ishin të rrallë edhe lexuesit e rregullt, ata që blejnë çdo numër të gazetës dhe të cilët dhanë vlerësimin për punën e kryer nga stafi i gazetës, duke dhënë edhe sugjerimet e tyre.
Objekt i panairit “Medical Expo” ishte i gjithë zinxhiri i Sektorit të Shëndetësisë dhe Industrisë së Shëndetit, pasi Shëndetësia Shqiptare sot ka nevojë që të promovojë në mënyrë dinjitoze veten e saj, stadin e zhvillimit dhe projeksionet e së ardhmes, përmes paraqitjes së zhvillimit të teknikave të reja dhe teknologjisë moderne, diagnostifikuese dhe kuruese.
Në këtë panair u ftuan të merrnin pjesë Institucionet e Kujdesit Shëndetësor, shtetëror ose privat të të gjitha niveleve, sipërmarrjet e përfshira në mënyrë të drejtpërdrejtë ose të tërthortë në sigurimin e shëndetit, si dhe të gjithë aktorët që prodhojnë apo sigurojnë teknologjinë e nevojshme mjekësore, të barnave dhe shërbimeve.
