Konsumimi i deri në pesë filxhanëve kafe në ditë është përgjithësisht i sigurt për shumicën e të rriturve dhe mund të lidhet me një rrezik më të ulët për sëmundjet kardiovaskulare, sipas një deklarate të re shkencore të Shoqatës Amerikane të Zemrës (American Heart Association).
Sipas ekspertëve, marrja e deri në 400 miligramëve kafeinë në ditë, e barabartë me rreth pesë filxhanë kafeje prej 240 mililitrash, konsiderohet e sigurt për shumicën e njerëzve.
Studimet e analizuara tregojnë se konsumimi i rregullt i kafesë me kafeinë, pa sheqer, shurupe aromatizuese apo krem, lidhet me një rrezik më të ulët për diabetin e tipit 2, sëmundjet e zemrës, goditjen në tru, insuficiencën kardiake dhe disa çrregullime të ritmit të zemrës.
Megjithatë, autorët theksojnë se është e vështirë të përcaktohet nëse këto përfitime vijnë drejtpërdrejt nga kafeina apo nga përbërës të tjerë bioaktivë që gjenden në kafe.
Sipas deklaratës, këta përbërës mund të kenë veti antioksiduese dhe anti-inflamatore, të cilat mund të shpjegojnë disa nga efektet pozitive të konsumimit të kafesë. Gjithashtu, shumica e studimeve të deritanishme janë vëzhguese dhe nuk provojnë një lidhje të drejtpërdrejtë shkak-pasojë.
Ekspertët nënvizojnë se nevojiten kërkime të mëtejshme për të kuptuar më mirë efektet e kafesë dhe produkteve të tjera që përmbajnë kafeinë. Ndërkohë, ata paralajmërojnë se marrja e sasive të larta të kafeinës, veçanërisht përmes pijeve energjike, është lidhur me pasoja të dëmshme për shëndetin kardiovaskular.
