Përhapja e sëmundjes së gjedhit, që ka prekur gjithë vendet e rajonit, ka vënë në alarm edhe shërbimin veterinar në vendin tonë. Nëpërmjet një njoftimi për shtyp, Autoriteti Kombëtar i Ushqimit bën të ditur se janë marrë masa për parandalimin e përhapjes së kësaj sëmundjeje, që ka prekur deri tani disa vende fqinje, si Kosovë, Maqedoni, Greqi, Bullgari etj.
Ministri i Bujqësisë, z. Edmond Panariti, ka dhënë urdhër që të ndalohet importi dhe tranzitimi i kafshëve të gjalla gjedh të prekura me sëmundjen Dermatoza Nodulare e Gjedhit (LSD), si dhe ndalimin e importit nga Kosova, Serbia, Greqia e Bullgaria në territorin e vendit tonë, të spermës së kafshëve të llojit gjedh, që preken nga sëmundja ne fjalë.
Ministri urdhëron gjithashtu ndalimin e lëvizjes së kafshëve të llojit gjedh, dhen dhe dhi nga fermat në drejtim të tregjeve, thertoreve dhe nga ferma në fermë, si dhe raportimin çdo ditë, për monitorimin dhe kontrollet e kryera në fermat e gjedhit në lidhje me sëmundjen e LSD.
“Çdo kafshë e llojit gjedh që do të lëvizë në kundërshtim me këtë urdhër, do të sekuestrohet në zbatim të ligjit”, thuhet në urdhrin e z. Panariti.
“Autoriteti Kombëtar i Ushqimit, duhet të informojë rregullisht, brenda 24 orëve për të gjitha produktet me origjinë nga gjedhët që vijnë nga Kosova, Serbia, Greqia dhe Bullgaria, të cilat janë të shoqëruara me kopje të certifikatës veterinare, që garanton se ato kanë kaluar trajtim të siguron shkatërrimin e virusit të Lumpy Skin Disease”, thuhet më tej në urdhrin e ministrit të Bujqësisë.
“Lumpy Skin Disease” është një sëmundje virale e Gjedhit dhe karakterizohet në mënyrë tipike nga nyje në lëkurë duke përfshirë gjithë sipërfaqen e trupit: kokën gjymtyrët, hundën, bishtin, mukozën e gojës. Kjo sëmundje ndodh gjatë verës dhe vjeshtës në muajt, kur insektet janë me shumicë, ndërsa sëmundja nuk paraqet rrezik për njerëzit.
Urdhrin e Ministrit mund ta lexoni këtu.
