Blerina Bombaj, dietologe
Përpiquni të përfshini të gjitha grupet e ushqimeve gjatë ditës për të marrë të gjithë nutrientët që ju nevojiten. Keni nevojë për 6-11 porcione drithëra, 2-4 fruta, 4 ose më shumë porcione zarzavate, 4 porcione bulmet dhe 3 proteina (mish, peshk, veze, fasule). Përdorni yndyrë bimore me karar.
Zgjidhni ushqime të pasura në fibra bimore si drithërat e plotë (buka e zezë, orizi dhe makaronat integrale etj), frutat dhe zarzavatet.
Sigurohuni që jeni duke marrë mjaftueshëm vitamina dhe minerale. Konsultohuni me mjekun tuaj për nevojat në suplemente të tillë.
Konsumoni minimalisht 4 racione bulmet, si dhe ushqime të pasura në kalcium, si: bajamet, peshku me hala, spinaqi, majdanozi etj.
Zgjidhni të paktën 3 racione nga ushqimet e pasura në hekur, si: mishi i viçit ose qengjit, thjerrëzat, frutat e thara, spinaqi, gjethet e panxharit etj. Shoqërojini me zarzavate dhe fruta të pasura në vitaminë C si specat e kuq, domatja, brokoli, kivi.
Zgjidhni çdo ditë të paktën një burim të pasur të vitaminës C, si: specat, kivi, manaferrat, luleshtrydhet, brokoli, domatja etj.
Zgjidhni patjetër një burim të pasur të acidit folik çdo ditë si zarzavatet jeshile, fasulet, mishi i viçit dhe qiqrat. Acidi folik është një vitaminë me rol tepër të rëndësishëm në parandalimin e defekteve të tubit neural të embrionit, si spina bifida.
Zgjidhni një burim të mirë të vitaminës A, një ditë po – një ditë jo. Burime të tilla janë karrotat, kungujt e dimrit, patatet e ëmbla, kajsitë dhe gjethet e panxharit. Kujdes: vitamina A nuk duhet marrë më shumë seç duhet pasi teprica e saj lidhet me keqformime të fetusit. Për këtë arsye është mirë të evitoni ushqime, si: mëlçitë pasi janë më shumë seç duhet të pasura në vitaminë A.
