Shefja e Epidemiologjisë dhe Sëmundjeve Infektive në Institutin e Shëndetit Publik Silva Bino ka rreshtuar disa nga arsyet pse është e rëndësishme të merret doza e tretë të vaksinës.
Në një videomesazh të shpërndarë nga ministria e Shëndetësisë, Bino thekson se ata që kanë marrë dozën e dytë deri në 6 muaj përpara duhet patjetër të vaksinohen me dozën e tretë për shkak se imuniteti fillon dhe ulet.
“Të gjithë qytetarët që kanë kryer dozën e dytë para 6 muajsh duhet patjetër të marrin dozën e tretë. Ajo është e rëndësishme për faktin se imuniteti ndaj COVID i shkaktuar nga vaksina fillon dhe ulet. Kjo nuk është hera e parë që ndodh pasi për një seri sëmundjesh infektive, kalendarët e vaksinimit krijohen duke u mbështetur në eksperiencë”, deklaroi Bino.
Ajo mori shembullin e disa vaksinave të tjera që ne marrim, dozat e të cilave injektohen në bazë të një kalendari vaksinimi të mbështetur në eksperiencë.
“Për shembull për tetanozin ne vaksinohemi 6-7 herë. Për polomelitin vaksinohemi 5 herë. Për sëmundje të tjera vaksinohemi disa herë. Kjo sepse imuniteti fillon dhe ulet dhe ka nevojë për doza përforcuese. Doza e tretë përforcuese na siguron ndaj formave të rënda të sëmundjes dhe ka ndikim të rëndësishëm në mosshfaqjen e infeksionit. Doza përforcuese ul kohëzgjatjen e mbajtjes së virusit. Nëse një njeri i vaksinuar infektohet, nuk shfaq shenja klinike dhe transmeton më pak virusin. Doza e tretë përforcuese ka një seri gjërash që bëjnë që kjo pandemi të kontrollohet dhe ne të kthehemi në jetën tonë”, shprehet ajo.
