Kirurgu i njohur prof. Etmond Çeliku, shef i shërbimit të kirurgjisë, prof. Ilir Ohri, shef i shërbimit anestezi- reanimacionit në QSUT me ekipin e tyre sapo kanë përfunduar me sukses një ndërhyrje kirurgjikale të gjëndrës tiroide, apo siç njihet operacioni i strumës, në Spitalin Rajonal të Korçës, ndërhyrje që nuk kryhej prej vitesh në këtë spital.
Sipas Ministrisë së Shëndetësisë, prej dy ditësh janë stacionuar në Spitalin Rajonal të Korçës neurolog, kardiolog dhe nefrolog nga QSUT. Patronazhi vijon prej ditës së djeshme dhe në Vlorë, Kukës, Gjirokaster dhe Burrel.
Plani i shpërndarjes së mjekëve të specializuar është nisma më e re e ndërmarrë nga Ministria e Shëndetësisë dhe Mbrojtjes Sociale për të mundësuar plotësimin mbi baza ditore nevojat me mjekë specialistë sipas kërkesave që kanë spitalet rajonale, duke u mbështetur njëkohësisht edhe me paketën e miratuar të stimujve financiarë
Ministria ka ndarë edhe kompetencat e 3 spitaleve universitare. Qendra Spitalore Universitare “Nënë Tereza” do të asistojë spitalet e Korçës, Elbasanit, Beratit dhe Dibrës. Spitali Universitar i Traumës do të ketë në patronazh spitalet e Gjirokastrës, Vlorës dhe Fierit. Ndërkohë ministria bën me dije se Spitali Universitar “Shefqet Ndroqi” do të shërbejë si institucion mbështetës për spitalet e Lezhës, Kukësit dhe Shkodrës./ Shendeti.com.al
