Denisa Canameti
Për të përballuar fluksin e madh të qytetarëve të prekur nga gripi, përveç spitaleve, katër qendra shëndetësore në Tiranë kanë kaluar në shërbim 24 orësh. Sipas Ministrisë së Shëndetësisë, kjo shpërndarje do të ndihmojë edhe Qsut-në, e cila është përballë një fluksi shumë të madh pacientësh.
Por, duket se vetë qytetarët nuk po e përfillin këtë nismë të Ministrisë, pasi ata vazhdojnë të zgjedhin masivisht QSUT-në. Rreth 500 është numri i fëmijëve të paraqitur pranë urgjencës pediatrike për 24 orë. Numër ky që ka mbetur i pandryshuar prej ditësh. Rreth 200 është numri i pacientëve adult, që paraqiten për 24 orë në shërbimin e urgjencës së infektivit.
Ndërkohë, në një nga qendrat shëndetësore paraqiten mesatarisht 20-30 raste. E ndërsa sa u takon Poliklinikave të Specialiteteve, të cilët kanë në strukturën e tyre mjekë pediatër, numri është akoma më i vogël. Të dhënat e marra nga regjistrat e mjekëve në këto Poliklinika tregojnë edhe vetëm për 4 raste të regjistruara përgjatë gjithë ditës.
Lidhur me situatën e gripit, Ministria e Shëndetësisë dhe Mbrojtjes Sociale ka ndërmarrë planin e masave për përballimin e qarkullimit të gripit në vend. Në të njëjtën kohë i bën apel qytetarëve të mos neglizhojnë shenjat e gripit por të konsultohen me mjekun e familjes për të parandaluar komplikacionet.
Nga të dhënat e Institutit të Shëndetit Publik, aktualisht vihet re një rritje e qarkullimit të gripit dhe virozave, por sipas Ministrisë nuk kemi situatë epidemie të gripit.
Për të gjithë kategoritë në rrezik për komplikacione, Ministria e Shëndetësisë dhe Mbrojtjes Sociale ka siguruar vaksinën FALAS për gripin stinor, duke filluar nga fëmijët, të moshuarit me sëmundje kronike, gratë shtatzëna, etj.
Katër qendrat shëndetësore në Tiranë, të cilat kanë kaluar në shërbim 24 orësh, për t’ju ardhur në ndihmë qytetarëve, pa patur nevojë të shkojnë në spitale.
Përkatësisht:
▫Qendra Shëndetësore nr 6 në Kombinat,
▫Qendra Shëndetësore nr 7 në Laprakë,
▫Qendra Shëndetësore nr 8 në zonën e ish-Bllokut,
▫Qendra Shëndetësore nr 10 në zonën e Oxhakut./ Shendeti.com.al
