Blertina Koka / Shëndet+
Mbrëmjen e djeshme, në emisionin investigativ “STOP” u shfaqën pamjet tronditëse të një personi me aftësi të kufizuara mendore, i cili mbahet i lidhur nga familjarët pasi shfaq shpesh shenja agresiviteti.
Fundim Dakavelli, nga Shijaku, është lindur me prapambetje të rëndë mendore. Babai i tij, Haki Dakavelli, tregon për emisionin ‘Stop’ se Fundimi “nuk ka folur asnjëherë, nuk është i aftë të kujdeset për veten e tij, bëhet nervoz, fillon gjuan, gërvisht veten…”. Për këtë arsye, prindërit dhe vëllai kujdesen për të 24 orë në 24, ndërsa ai qëndron i lidhur dhe me duar të mbuluara që të mos lëndohet. Familjarëve u duhet ta ndërrojnë mesatarisht 4 herë në ditë, pasi ai i gris veshjet.
Megjithatë, familja Dakavelli nuk merr asnjë kontribut për t’u ardhur në ndihmë. Kur ishte 5 vjeç, familjarët iu drejtuan instancave përkatëse për të përfituar ndihmën ekonomike dhe statusin e invalidit. Para 10 vitesh, KMCAP i Durrësit, duke parë gjendjen e rënduar të djalit, i dha statusin e paraplegjikut, një status që e mbajti deri në 2015-ën. Në këtë kohë, dosja e tij u nis në KMCAP-in Epror dhe nga ky i fundit, u la pa asnjë grup.
Familjarët e tij e kanë denoncuar rastin tek emisioni “Stop” me shpresën se mos gjejnë ndonjë zgjidhje, pasi vetëm me pensionin e kryefamiljarit nuk mund t’ia dalin. E pyetur nga gazetarët e emisionit, Përgjegjësja e Sektorit Juridik në Shërbimin Social, Marjeta Gjelaj, thotë se i sëmuri nuk mund të marrë dot para sepse KMCAP-i Epror, e ka bërë vendimin në mënyrë të pakthyeshëm.
Për më tepër, ndiqni videon.
