Elona Tereziu / Shendeti.com.al
...Kisha menduar të bëja nja dy-tre foto t’ia çoja kryeministrit, t’i tregoj se ç’është Rilindja, por më mirë që erdhët ju! Kemi ardhur për t’u shëruar, por po sëmuremi më keq. Djersitemi, lagemi e thahemi prapë. Ditën me kompresa, natën pa gjumë…!
Ky është makthi i pacientëve të Spitalit të Sëmundjeve të Brendshme në QSUT, të cilët në kushtet ku temperaturat e larta kanë arritur kulmin, janë të detyruar të përballen me një situatë të tillë, ku institucioni i cili pretendohet se “ofron” shëndet, nuk siguron as kushtet më minimale siç është kondicionimi.
Në të 6 katet e godinës, duke nisur nga Kardiologjia, në pavionet ku qëndrojnë të shtruar pacientët, Endokrinologji, Gastroenterohepatologji, Hematologji, Nefrologji, me përjashtim të repartit të Hemodializës, mungojnë kondicionerët.
Të ndodhur në një situatë të tillë, shumë pacientë janë munduar ta zgjidhin vetë, dikush duke marrë një freskuese nga shtëpia, të tjerë me mjetë rrethanore (copa kartonësh, napa, peshqir të lagur, çarçafë të kthyer në perde etj).
Burime brenda QSUT-së deklarojnë se për shkak të një situate të tillë, është shtuar dhe numri i pacientëve që paraqesin komplikacione me hipertensionin dhe çrregullimet e frymëmarrjes, ndërkohë që shumë prej tyre po mbahen me oksigjen.
Të indinjuar, pacientët nuk ngurrojnë të shprehin dhe ankesat e tyre.
Myzejen Sila është një nga pacientët e shtruar në repartin e nefrologjisë prej 6 ditësh.
“Kam 6 ditë që jam shtruar këtu. Unë jam me diabet, tension po e po, por kam hequr dhe veshkën. Shikojeni se në çfarë vape na kanë lënë. Më thoni si mund të bëhet një serum në kushte të tilla, ku temperaturat në dhomë kanë arritur 40 gradë?!”
Zoje Xhekollari: “Kisha menduar të bëja një dy-tre foto t’ia çoja kryeministrit, t’i tregoja ç’është Rilindja, por më mirë që erdhët ju. Jemi shtruar për t’u shëruar por po sëmuremi më keq. Djersitemi, thahemi, lagemi prapë. Ditën me kompresa, natën pa gjumë”.
A.H: “Kam mamin të shtruar që prej të shtunës. Jo vetëm freskuesen, por edhe karrigen e kam sjellë nga shtëpia pasi nuk kam ku të ulëm. Rrimë me napa e kompresa të lagura tërë kohën. Nuk dimë as ku të ankohemi”.
Zaide Lami: “Sot është dita e parë që jam shtruar dhe veç sëmundjes, po mendoj si do të përballoj vapën. Rrimë me napa të lagura tërë ditën, por kjo nuk është zgjidhje”.
Ndërkohë që vetë Ministria e Shëndetësisë pati publikuar pak ditë më parë një sërë masash për përballimin e temperaturave të larta, ku në një prej pikave të protokollit thuhet: “Ambienti në të cilin jetojnë të jetë i freskët dhe i ajrosur mirë, nëpërmjet ajrit të kondicionuar, ventilatorëve ose nebulizatorëve për lagështimin e ajrit”, duke rënë ndesh kështu me realitetin./ Shendeti.com.al
