Kreu i departamentit të shëndetësisë në Partinë Demokratike, Tritan Shehu ka denoncuar sot atë që e cilëson një skandal të vërtetë në spitalin e Lushnjës, në krye të të cilit sipas tij është zgjedhur një zonjë që ka mbaruar me korrespondencë shkollën për ekonomi agrare.
Përmes një postimi në faqen zyrtare në Facebook, Shehu shprehet se personi në fjalë nuk ka asnjë kualifikim sanitar dhe puna e saj në disa dekada nuk ka asnjë lidhje me sistemin shëndetësor.
“Një zonjë, që ka mbaruar studimet e mesme për degën “mekanike” dhe ato te larta me korrespondence për “ekonomi agrare” emërohet në prag pensioni në atë detyrë të vështirë.
Personi ne fjale nuk ka asnjë kualifikim sanitar. Në disa dekada pune të saj në sektorin postal e prefekturë, nuk gjen lidhje me sistemin shëndetësor.
Unë nuk e di sa e aftë është ajo në profesionet e saj, por pa dyshim nuk plotëson kërkesat më minimale për të drejtuar një institucion shëndetësor, aq më shumë një spital.
Spitali i Lushnjës është një qendër me traditë të pasur klinike dhe me një staf të afte e dinjitoz.
Një emërim i tillë jo vetëm që nuk i shërben zhvillimit të asaj qendre, por dhe kontraston tërësisht me kapacitetet teknike e njerëzore të spitalit.
Me të drejte kolegët lushnjarë më shprehën indinjatën dhe ofendimin që ndjejnë me emërime të tilla drejtuesish, tërësisht jashtë çdo kriteri profesional.
Në Lushnjë dhe kudo në vendin tonë tashmë ka mjekë a personel shëndetësor, të afte për të drejtuar me kompetencë institucionet e tilla. Jo të pakët janë dhe ata që kanë studiuar e janë diplomuar për menaxhim shëndetësor.
Respektimi i këtij principi është thelbësor për zhvillimin e sistemit tonë shëndetësor dhe për të ngritur dinjitetin e personelit të tij”, shkruan Shehu në Facebook.
