Gjykata e Tiranës la dje në burg Pjerin Xhuvanin (kryetar i LSI-së në Elbasan, i shkarkuar po dje), ish-drejtor i Fondit të Detyrueshëm të Kujdesit Shëndetësor për Tiranën dhe Hysni Roçin, administrator i Farmacisë, Lundër.
E njëjta trupë gjykuese vendosi masën e sigurisë arrest shtëpie për 3 punonjës të Fondit dhe detyrim paraqitje për katër drejtues farmacish, të përfshirë në skandalin e mashtrimit përmes rimbursimit të barnave.
Pjerin Xhuvani
E para që është paraqitur përpara togave të zeza ka qenë Frida Lamçe, specialiste e kontrollit ekonomik, e cila është përlotur në momentin kur ka dëshmuar përpara gjykatës. Në sallën e gjyqit Lamçe tha se ishte detyruar të firmoste 3 shkresa në lidhje me rimbursimet dhe, sipas saj, juristja e drejtorisë e kishte kërcënuar me largim nga puna nëse nuk do të firmoste.
Më herët prokuroria e Tiranës shpjegoi edhe skemën mashtruese të ngritur nga ish-drejtori Xhuvani dhe administratori Hysni Roçi, ku nëpërmjet faturave fiktive të ilaçeve, i shkaktuan shtetit një dëm prej 56 milionë lekësh.
Ndër të tjera, thekson akuza, si rregull, duhet që çdo farmaci të furnizohej nëse kanë jo më pak se 60% të barnave të listës alternative të parë, por kjo nuk ka ndodhur pasi nga verifikimi ka rezultuar se në gjendje këto farmaci kanë pasur 60% të barnave.
Ndërkaq, ish-drejtori Xhuvani, ka lidhur kontratën me katër farmacitë objekt hetimi pa u zbatuar procedura e rregullt. Gjithashtu, marrja në pyetje e mjekëve që figuronin të kenë lëshuar recetat për pacientët të cilat janë ekzekutuar më pas nga farmacitë per periudhën kohore 01 tetor 2014-31 mars 2015, rezulton se mjekët nuk i kanë lëshuar këto receta.
Lidhur me skandalin e barnave, prokuroria më datë 5 qershor lëshoi 9 urdhër-ndalimesh ku 4 ishin drejtues të Fondit të Detyrueshëm të Kujdesit Shëndetësor, ndërsa të tjerët ishin drejtues farmacie.
Mbi ta rëndojnë 4 akuza si, “Shpërdorimit të detyrës”, “Mashtrimit në subvencione”, “Pastrimit të produkteve të veprës penale” dhe Falsifikimit të dokumenteve shëndetësore”.
Personat e përfshirë në skemën e mashtrimit:
- Pjerin Xhuvani, drejtori Rajonal i Fondit të Detyrueshëm të Kujdesit Shëndetësor Tiranë
- E.Mara, juriste pranë Drejtorisë Rajonale të Fondit
- K.Mahmutaj, punonjëse pranë Drejtoria Rajonale e Fondit
- H.Roçi., administrator i Farmacisë, Lundër
- M.Tufi, srejtuese teknike e farmacisë Lundër
- N.Thanasi, drejtues Teknik i farmacisë “Nutrimed”
- A.Spahiu, drejtues Teknik i farmacisë Bërzhitë
- A.Manaj, drejtuese Teknike e farmacisë “Adelina”.
- Frida Lamçe, ekonomiste
