“Kontrolli është bërë nga strukturat audituese të Fondit dhe çështja është dërguar në prokurori nga vetë Fondi për hetime të mëtejshme”. Kjo është përgjigjja dhënë për “Shëndet+” nga Fondi i Sigurimit të Detyrueshëm të Kujdesit Shëndetësor (ISKSH) lidhur me skandalin e 150 000 000 lekëve.
Në raportin e kontrollit të kryer thuhet se nga kontrolli i ushtruar në Fond dhe Drejtorinë Rajonale Tiranë janë konstatuar shkelje të rënda në menaxhimin e këtyre institucioneve.
Nga hetimi i deritanishëm përllogaritje e dëmit të shkaktuar me anë të skemave të ndryshme që kanë operuar me qëllim vjedhjen e fondeve publike arrin në shifrën e 150 000 000 (njëqind e pesëdhjetë milion) lekëve.
Gjithsesi në këtë raport deklarohet se kjo shumë mund të jetë edhe më e madhe.
“Duke u bazuar në analizën e sukbjekteve farmaceutike që kanë kontratë me fondin, si dhe vlerat e depozituara nga ato me anë të recetave të rimbursueshme, grupi i kontrollit ka dyshime të bazuara se dëmi i shkaktuar buxhetit të shtetit arrin shifra edhe më të larta, për evidentimin e të cilave duhet një kontroll gjithëpërfshirës nga struktura të specializuara në mënyrë që të arrihet filtrimi i çdo aspekti që lidhet me çështjet e rimbursimit të ilaçeve që i përkasin listës së barnave të rimbursueshme”.
Pritet që të ketë një prononcim nga ministri i Shëndetësisë Ilir Beqaj lidhur me çështjen./ Arlinda Gjypi
