Denisa Canameti, “Shëndet+”
Ndërron jetë në spitalin e Bergamos 11-vjeçari shqiptar Kristi Maze. Vogëlushi nuk ka mundur dot të fitojë betejën me operacionin. Betejë të humbur e ka konsideruar edhe gazetari Erjon Skëndaj. Ishte ky i fundit i cili solli në vëmendjen e medias, politikës dhe shoqërisë civile rastin e djaloshit që kërkonte shpresën për jetë në vendin fqinj.
Skëndaj nuk i ndali përpjekjet edhe përballë “presioneve” nga ana e Ministrisë së Shëndetësisë, e cila nuk kontribuoi as me një ambulancë deri në aeroport, me pretendimin se nuk ishte rast urgjent. Kristi u nis për në Itali. Vetë Skëndaj në profilin e tij në Facebook, informonte hap pas hapi për gjendjen e djaloshit. Por, duket se mrekullia nuk ishte e thënë të ndodhte.
Kristi ka ndërruar jetë sot dhe fjalët e Skëndajt në rrjetin social Facebook kanë prekur të gjithë.
“Sot ndiej se një njeri i familjes m’u largua nga kjo jetë. U lidha shpirtërisht me ty Kristi dhe nuk kam justifikim, sepse nuk ja arrita dot të të shpëtoja e të mbaja premtimin që të dhashë. Po kështu paska qenë e shkruar, ti të bashkohesh me engjëjt dhe mijëra shqiptarë që të deshën me shpirt të vuajnë brengën që ti ike” shkruan gazetari.
